رسالة باسم فتحى من داخل معتقل الغربانيات .. برج العرب

بسم الله الرحمن الرحيم
الى امى و ابى و سمير :
على فكره الوضع ليس بهذا السوء الذى تخيلونه بالضبط كانه فى معسكر كشافه او رحله لسانت كاترين او البرتغال ويمكن كمان الحياه فى السجن افضل من الحياه فى معسكرات الكشافه صدقونى مش ببالغ والله الحاجه الوحيده اللى نكدت وكانت بتنكد عليا جوه الحبس هى خوفى عليكم من القلق واللى بيدور فى دماغكم خصوصا دماغ ماما اللى بتروح وتيجى . اكتر حاجه بايخه فى الحبس هو موضوع مصادرة الموبيلات و فى الطبيعى ان اول ما نتمسك قانونا لينا نكلم اهالينا والمحامين لكن ولاد الوس** بتوع امن الدوله اعلى من القانون فى البلد الوس** دى.لكن قبل اى حاجه و بعد كل حاجه ... احساسى بانى محبوس فى كلمة حق ضد الظلم و القهر والفساد و الاستبداد مدينى قوة رهيبه الحمد لله , وده حالنا كلنا زائد ان السياسيين بيتعاملوا بطريقه مختلفه بصراحه قد ما امن الدوله ولاد وس** على قد ما ضباط وعساكر وامناء مصلحة السجون اغلبهم كويسين وولاد حلال وبيعاملونا بمنتهى الاحترام رغم توصيات امن الدولة ليهم انهم يقرفونا . المهم ... اول يومين هما اللى كانو بهدلة بين القسم والنيابه و البيات فى الترحيلات وان شاء الله مش حنسكت لهم ع البهدله دى , لكن الحياة بدات بقى لما اترحلنا على سجن برج العرب , الضباط والعساكر استقبلونا كويس جدا كاننا اصحاب المكان , لينا حبس لوحدنا مع السياسيين والاخوان فى عنبر واحد وداخل العنبر احنا ال 14 محبوسين فى زنزانه واحده مع بعض طول النهار باب الزنزانه بيكون مفتوح وبنخرج نلعب ونقعد مع باقى السياسيين .. باقى السياسيين بقى اللى كانو قصة, اول ماجينا مكنوش عارفين يعملوا معانا ايه واللا ايه نظفوا لنا الزنزانهوفرشوها وركبولنا لمبة موفره للطاقه وقعدوا يجيبوا لنا اكل وشاى وميه وكولاوتانج وكانو شايليننا من على الارضشيل .. طبعا مستغربين .. احنا كنا بنقول لو نصور بس قعدتنا هنا و نبعته لاهالينا هيشتمونا على القلق والهم اللى هما عايشينه .. الدلع ده يادوب حاجه كده على سبيل فك الازمه "باعتبار ان دى ازمه " لكن لسه الدلع لما تيجى لنا الزيارات مع المحامين و لما تيجى لنا الاعاشه .. اما قعدتنا مع بعض لا توصف اليوم مش بيكفينا من اللى بنعمله لعب و هزار وحكاوى وعلام فى السياسه ده غير حوارات الثقافه والفكر اللى انا شخصيا بستمتع بيها جدا , اخيرا .. احنا واخدين 15 يوم على ذمة التحقيق فى سجن برج العرب والنهارده الاحد استئناف لقرار النيابه علشان نقضى فترة التحقيق فى البيت ولو الاستئناف محكمش بكده هنكمل ال 15 يوم بعدين نتعرض على النيابه تانى ..عموما تابعوا مع مركز هشام مبارك ومع المحامينومعاكو محمد عواد دايما كلموه .. ولو ماما عايزه تتكلم مع حد خليها تاخد نمرة اسماء او مديحه او ايناس وهما هيظبطوها , المهم متتعبوش نفكم و تيجوا السجن , ممكن تبقوا تيجوا فى عرض النيابه فى المنشيه بعد 15 يوم علشان اشوفكم , ولحد ده ابعتوا فلوس للجنة الاعاشه
زنزانة 15 -عنبر السياسيين - سجن برج العرب
باسم فتحى ... الاحد 27/7