السبت، 26 أبريل، 2008

أن تبدء بنفسك ......هذا وحدة لا يكفي

يا سادة قبل ما نطلب من الناس انها تراعي ربنا وتراعي ضميرها خلينا نقول فين القانون وفين اللي بيطبق القانون
متغافل لية ....
مطنش لية ..
.سايب الدنيا فوضي لية ...
المصري هيستجيب للنظام والقانون بس فين اللي يطبق القانون والنظام ...
.عايزينها دولة قانون وحتي اللي معندوش ضمير مش هنتوسل الية ونرجو منة يبقي عندة ضمير لأن القانون قادر علي إصلاحة و إخضاعة لسطوه المجتمع والشرعية .....القانون ......القانون ......القانون
في موجه من الأراء تطلب من الناس ان تبدء بنفسهم ويراعو ربنا في اعمالهم وكأن دة هوه المفتاح والحل السحري لكل أو حتي لبعض مشاكلنا ومع إحترامي الشديد لأصحاب هذا الرأي وبفترض فيهم حسن النية إلا إن هذا الكلام لو طبقناة بشكل منفرد وفردي مننا بدون مشاركة الحكومة والقيادة السياسية لهذة البلد فلن يكون هناك اي نتيجة أو فائدة ودة للأسباب التالية :
- المصري لما بيعيش في بيئة يحكمها القانون بيلتزم والدليل علي كدة :
- شوف المصريين في اوروبا وامريكا تصرفاتهم وسلوكياتهم وأدائهم لأعمالهم اية اللي بيحصل فية - شوف المصريين ايام احمد رشدي لما كان وزير داخلية كان قد اية الشارع المصري منظبط
- شوف المصريين وسلوكياتهم في مترو الأنفاق في اول افتتاحة وكان تطبيق الغرامات بشكل فوري علي الجميع كانت الناس ماشية زي الساعة الثلاث نماذج دول معناهم ان المصري زية زي اي جنسية لو لقي في قانون ونظام ماشي علي الكل هيحترم هوه كمان النظام وخصوصا لو كان في عقاب للمخالف بس بشروط :
- العقاب علي الجميع مش علي ناس وناس - يكون في جدية في تطبيق القانون مش كدة وكدة " يعني معقولة غرق عبارة وموت 1033 مصري تبقي جنحة "
- ميكونش تطبيق القانون علي طريقة الحملات يعني هوجه وتخلص عايزين تطبيق طول الوقت بشكل دوري اعتيادي زي الدول المحترمة " إحنا بس اصحاب مصطلح حملة مرورية " ولية متبقاش علي طول هوه في قانون بارت تايم في الدنيا لية المصري بيشتغل بره وبينتج وبينبغ وبيشرفنا وربنا بيفتح علية !!!!؟؟؟؟
خد دكاترة الجامعة مثال ولية البحث العلمي هبط ببساطة عشان برة المعيار هوه الكفاءة مش عشان الأمن راضي عنة فيوصل للعمادة وغيرة الأكثر كفاءة يقعد علي جنب ........دة بيولد الأحباط بين المجتهدين ثانيا : الدولة بتمارس نوع من الفساد المجتمعي زي المحسوبية والواسطة وعلي كل المستويات
وكلنا فاكرين محمد شتا الشاب اللي انتحر عشان رسب في اختبار الخارجية لأنة غير لائق إجتماعيا " دة علي المستوي الفردي " وعلي المستوي الجماعي شوف قضية دفع مبالغ مالية قدمتها الحكومة لنواب الحزب الوطني وما اخدش زيهم نواب المعارضة " كأن الحكومة بتعاقب الناس عشان اختارو نواب غير نواب الوطني
اللي بيدير المجتمع مبيطبقش مبدء الثواب والعقاب بين الناس يعني تلاقي مسؤولين عاملين بلاوي ومحدش بيحاسب حد ولو حاسبة يبقي كدة وكدة مش بجد وأحيانا كمان ياخد وسام ومكافأة ( شوف رئيس الوزراء ووزير الأسكان السابقين )......
وفي امثلة كثيرة جدا بتقولنا ان اللي بيتحاسب بس اللي ملوش ظهر: إحتكار الحديد والطناش علي المحتكر إحتكار الخط الملاحي بين مصر والسعودية و غرق 1033 مصري واعتبارها جنحةتجاهل احكام قضائية ببطلان انتخابات المحليات في 10 محافظاتتجاهل احكام القضاء ببطلان عضوية نواب مجلس الشعب بحجة ان المجلس سيد قرارة
تجاهل قرار النائب العام بالأفراج عن إسراء وأستمرار إعتقالها لفترة بعد قرار النيابة
تجاهل طلب محكمة النقض لأستكمال التحقيق مع وزير الزراعة الأسبق في قضية المبيدات المسرطنة
خروج بشوات من صالة كبار الزوار بفلوس البنوك المصرية
رفع الحصانة عن أعضاء بسرعة البرق وناس تانية ولا حتي بالطبل البلدي " عشان انهم حزب وطني "
كل دة بيعطي انطباع لرجل الشارع ان اللي مالوش ظهر بس هوه اللي بيطبق علية القانون فكل واحد يقول الكلمة اياها " هية جت عليا انا "والدليل علي كدةفي محاكمة جزار الحمير واعتداء اسرة المتهمين علي الصحافة كانت هية دي الكلمة اللي الكل بيقولها من اهل المتهمين " يعني هية مجتش غير علينا احنا ....ما تروحو تشوفو الفساد اللي بقي للركب ومعروف للكل والكل مطنش وبيستفيد من بعضة " مثال أخر (صاحب العبارة عضو في مجلس الشوري بالتعيين يعني بقرار جمهوري .....مين اللي رشح ممدوح اسماعيل لعضوية الشوري ....ومين حاسب اللي رشحة ) يا سادة قبل ما نطلب من الناس انها تراعي ربنا وتراعي ضميرها خلينا نقول فين القانون وفين اللي بيطبق القانون متغافل لية ....مطنش لية ...سايب الدنيا فوضي لية ...المصري هيستجيب للنظام والقانون بس فين اللي يطبق القانون والنظام ....عايزينها دولة قانون وحتي اللي معندوش ضمير مش هنتوسل الية ونرجو منة يبقي عندة ضمير لأن القانون قادر علي إصلاحة و إخضاعة لسطوه المجتمع والشرعية .....القانون ......القانون .........القانون
جزء من حديث شريف
قال" أما بعد فإنما أهلك الذين من قبلكم أنهم كانوا إذا سرق فيهم الشريف تركوه وإذا سرق فيهم الضعيف أقاموا عليه الحد وإني والذي نفسي بيده لو أن فاطمة بنت محمد سرقت لقطعت يدها" المقصود بكلمة الشريف: أعيان البلد و أكابر القوم

ليست هناك تعليقات: