الاثنين، 14 أبريل 2008

لا تقتلوا حركة 6 ابريل

السلام عليكم
ازاي أخوانا في حركة 6 ابريل
أنا والدي مهندس و كل شوية اقوله اننا حركة 6 ابريل على الفيسبوك بنقول و هانعمل وخليته يقرأ و يشوف الحاجة اللى احنا بنعملها و طبعا الراجل اعجب جدا بأن شباب زينا شايلين هم البلد المهم الباشمهندس حابب يقول كلمتين ياريت تسمعوه
**********************لا تقتلوا حركة 6 ابريل*******************************
السلام عليكم و رحمة الله و بركاته
ازيكم يا شباب في الأول بأحب أهنيكم باللى عملتوه يوم 6 ابريل انتم عملتم اللى ماقدرش حد في تاريخ مصر كله يعمله لا حركات ولا جماعات ولا أحزاب انتم هزيتوا البلد و هزيتوا الحكومة زمان لما كنا نفكر ازاى نغير البلد ماكناش بنلاقي أي طريقة ممكنه. الحزب الحاكم ماسك البلد بحاذفيرها قنوات اعلامية و صحافة حكومية و ماكنش حد يتصور أن مجموعة شباب على موقع الكتروني ممكن يتجمعوا على حاجة واحدة و يحركوا مارد نايم بقالة 27 سنة أنتم ممكن تكونوا مش مقدرين قدراتكم و المسئولية اللى اتحطت عليكم بس اللى انتوا عملتوه دا مش ممكن يتكرر ولا بعد 100 سنة لو ماأستغلوتهوش صح ممكن هاتفضلوا تندموا عليه انتم و اولادكم طول عمركم انتم دلوقتى معاكوا الشعب المصري الشعب كله شايف فيكم الأمل اللى ممكن يضغط على الحكومة ياريت قبل ما تقدموا على أي حركة تفكروا فيها 100 مرة لأن اي خطوة غلط هاتموت الحركة و تفقد الناس الثقة فيكم لان الخطوات الاولى بتكون حساسة جدا و مؤثرة و انتم رجلكم موجودة في المجتمع بس لسة ما أتثبتتش (لازم تقدر حجمك كويس) انتوا لسه ماكبرتوش بس أكيد هاتكبرواانتم اديتوا الناس أمل في ان التغيير ممكن بس ماينفعش اللى أنا قريته انكم بتطالبوا بتغير الحكومة و الحجات ديلازم تقدروا انكم لسه اصغر من الخطوة دي لازم تثبتوا وجودكم اكتر (الصبر الصبر) احنا انتظرنا 27 سنة ماتستعجلوش انتم الموضوع في شهرينواحسبوها و ادرسوا مطالبكم لو الحكومة بكرة اتغيرت هايجي وزراء جدد و البلد تبوظ أكتر و هيقولوا انهم لسه ماسكين و يوعدوا ان الوضع هايتحسن لما يدرسوا الموقف و هاتعدي سنة و را التانية و مفيش حاجة هاتحصل (لازم تتعملوا من الدروس اللى اتعملت فينا قبلكم)ناس تانية تطالب باقالة الرئيس الكلام دا ماينفعش حتى الشعب و الناس نفسها مش مستعدة لكدا معلش برضة لازم تعرفوا ان نص الشعب ناس كبيرة في السن و أخدت على الوضع و هاتقلكم الكلام بتاع (اللى نعرفه احسن من الى مانعرفهوش و حركة عيال على النت هاتقلب البلد) و مش هايكونوا مؤمنين بقدراتكم اللى انا عارف انها كبيرة جدا بس لازم تخططوا و تستنوااليهود علشان يبني الدولة خططوا لقرون و حسبوا كل خطوة 1000 مرة انتم مش اقل منهم لازم تخططوا قبل ماتشتغلوا و ربنا اداكم فرصة في تجمعكم هنا
بالنسبة لاضراب 4 مايونفكر بالعقل اية اللى انتم استفادتوه من اضراب 6 ابريل؟؟؟ استفدتم انكم اثبتوا تواجدكم في الشارع بقوة (دا انجاز اثبتوا تواجدكم في يوم واحد) رعبتم الحكومة، الشعب شاف فيكم منقذه بدون اي تدخل من اي جماعة او احزاب انتم مصريين و بس محدش يعرف انتم كبار ولا صغار مسلمين ولا مسيحيين بس مصريين و الناس كلها مستنيه خطوتكم الجاية علشان يمشوا وراكم كفاية ان الاسعار لاول مرة بدات تنزل حتى لو شلنات الحكومة وصلتها الرسالة و بدأت تدور على حلول علشان غضب الشعب و غضبكمطيب انتم عايزين تكرروا الموقف دا يوم 4 مايو و تضربوا تانى هايحصل حاجة من اتنين مالهمش تالت الاضراب ليفشل لينجح لو فشلها تفقدوا ثقة الشارع و الناس كلها هاتقول دي كانت حركة و ماتت و مهما حاولتم بعد كدا مش هاتقدروا تقنعوا الناس انها تسمع كلامكم تانى و ماتنسوش ان انتم لسه ليكم أعداء بيتربصوا بيكم في الشارع و بيقولوا انكم ماعملتوش حاجة و الاضراب فشل (فلازم تثبتوا نفسكم اكتر الاول)أو انها تنجحو في الحالة دي هاتثبتوا أنكم موجودين تانى بس ما انتم خلاص اثبتم كدا عايزين تكرروه ليه؟؟ ممكن عايزين تستغلوا نجاح الاضراب الاول و مش عايزين الناس تنساكم بسرعة و بتضربوا على الحديد و هو سخن و تبعتوا رسالة تانية للحكومةطب مادا ممكن من غير ماتضيعوا سمعتكم اللى اكتسبتوها في ناس هنا اقترحت اقتراحات جامدة بأن الناس تعلق شارات سوداء في البلكونات يوم 4 مايو اللى هو ميلاد الرئيس بجد الفكرة دي عبقرية لأن دي رسالة واضحة للحكومة بأنها مرفوضة و مش هاتقدر مهما عملت تبيض صورتها في الاعلام لأن البيوت كلها لما تعلق هاتثبت ان الشعب هو اللى عايز كدا مش زي مالحكومة بتقول ان تنظيم خارجي هو المنظم للموقف أو ان اللى المضربين دول اقليهو الناس مش هاتكسل أسهل حاجة انشر قميص اسود في البلكونةغير كدا ان فيه قري و مدن صغيرة كتير مالقتش حاجة تعملها في الاعتصام الاولانما من السهل ان البلد كلها تعلق شارات سودا و يبقى انتم كدا موجودين في كل بيت مصريزي ماقلت ماتستعجلوش الايام جاية كتيربس لأن اليوم اللى جاي دا له معني(عيد الميلاد) فموضوع الشارات السوداء مش هاتعرفوا تعملوه في أي يوم تانىبس هايكون مناسب جدا يوم 4 مايوأما بالنسبة للناس اللى مستعجله فصدقونى لو حبيتوا تهدوا البلد فأسهل حاجة ان البلد تتهد بس مين يحب ان يكسر بلده زي ماالمحلة ادمرت تمامااحنا نفسنا بلدنا تتبني و تكون احسن بلد في العالمعندكم مناسبة جاية يوم 1 مايو عيد العمال دا أجازة لو عايزين تهدوا البلد ممكن تعكسوا الشعار و تقولوا للناس ماتقعدوش في البيت تخيلوا البلد كلها مش هاتروح الشغل ولا المدارس ولا الجامعة و هاتنزل الشارع بالملايين و أكيد هاتحصل مصادمات مع الامن و المدن كلها هاتكون "محلة" و البلد هاتدمر تماماأنا متأكد أن احنا كلنا مش عايزين كدا و افتكروا (حاكم غشوم ولا فتنة تدوم) طب ممكن نعمل اية في اليوم دا؟؟؟ ماعرفش بصراحة بس متأكد ان فيه حد فيكم هايكون عبقري و هايقول فكرة معقولة يستفيد بيها الناس و التجمع بتاعكم و الحركة كلها كمان و نصيحة بجدانتم لسه ماوصلتوش لحجم تقدروا تطلبوا فيه مطالب(ولما توصلوا ابعدوا عن الشعارات اللى اضحك بيها علينا: عايزين ديمقراطية و عيشة كريمة و مرتبات مجزية والكلام العايم دا مفيش مسئول هايطلع يوافق على طلباتكم و يقول الشهر الجاي هايكون فيه عيشة كريمة )كمان فكرة مقاطعة الجرايد الحكومية شهر مثلا من أول مايودي فكرة جامدة جدا بس لو انكم كلكم اتبنتوها بجد(ماينفعش تقول للناس قاطعوا جرايد الحكومة للأبد واحدة واحدة قبل أي خطوة حط نفسك مكان الناس، و افتكر على طول ان مش كل الشعب مخه نضيف زيك: على طول الخط حط اسوء الاحتمالات قدامك: يعنى حتى لو ربع الناس بس قاطعت دا مكسب جامد ليكم تبقى دي فكرة كويسة و توضع في حيز التنفيذ)و بعدين فكروا في مقاطعة سلع استهلاكية بعينهاأهم حاجة روح الجماعة مش مهم مسلم او مسيحي او اخوان او كفاية أو حتى حزب وطني المهم في البلد ترفعوا راس البلدو انتم بتصلوا ادعوا للبلد من قلبكم (لايغير الله مابقوم حتى يغيروا ما بانفسهم)أنا أكيد طولت عليكمفي النهاية صدقونى الفرصة مش هاتكرر دي تانى فأرجوكوا ماضيعوهاش البلد أمانة في أيديكم و السلام عليكم و رحمة الله و بركاتة
By:Fady Mohamed

ليست هناك تعليقات: