الجمعة، 25 أبريل، 2008

حمد لله على سلامتك يا إسراء يا غالية

الحمد لله على سلامة إسراء وحريتها
أنا سمعت كلامها مع اللي اسمه معتز ع المحوريا ريت يا جماعة ردود الأفعال اللي عند كل حد فينا يخليها لنفسهإسراء دفعت تمن غالي لوحدها أعتقد إننا كنا بنطالب بحريتها مش بنطالب إنها تموت نفسها عشاننا
محدش فيكو عاش تجربة الاعتقال دي خصوصا لو بنت محدش عارف إيه اللي حصلها وإيه اللي اتهددت بيه إسراء استخدموا معاها أقسى إجراء ممكن وهو الاعتقال الإداري يعني اتصرفوا برة أي قانون يعني معندهاش امل في محكمة ولا نيابة ولا أي حاجة اتخطفت بقرار من حبيب العادلي وخرجت بقرار منه محدش مننا خرجها إسراء كان معزولة عن العالم طول الوقت اللي فات لا بتدخل نت ولا حتى بتقرا جرايد ومتعرفش إيه اللي حصل ومعندهاش أي فكرة عن الجروبات والبانرات وكل الكلام اللي اتكتب عنها
إسراء مجرد بنت مصرية حرة جتلها الدعوة دي وعملت جروب كلنا اشتركنا فيه وحصل إنجاز ستة ابريل
إسراء ما طلبتش من حد تبقى زعيمة ولا قالت إنها مستعدة تضحي بحياتها عشان احنا ننبسط ونصقف
إحنا اللي صنعنا ده ومخدناش رأيها
إسراء طول الوقت اللي فات عدت على جهات كتير من أول أوسخ مستوى في الداخلية لحد الأمن القوميهما لقوا فيها كبش الفدا لفشلهم في قمع الإضراب ويظهر إن ناس فينا عايزينها برضه كبش فدا
سيبوا إسراء في حالها واحمدوا ربنا إنها رجعتلنا محدش فيكم عارف حصلها إيه ولا خرجت بناء على إيه يا ريت كل واحد فيكم يفكر ويحط نفسه مكان إسراء دلوقتي بعد كل اللي اتعرضتله ويحط افتراض انها ممكن تكون خرجت بعد تهديد بالتعرض لأمها مثلا أو بتلفيق قضية آداب ليها وهي بنت في مجتمعنا اللي انتو عارفينها وده أسلوب متبع جدا عند الداخلية أو بتهديد إنها لو اتكلمت هيتقبض عليها تاني ومش هترجع صحيح الكلام اللي قالته كلام يضايقنا كلنا ومكنش اللي احنا عايزين نسمعه بس ده اختيارها بناء على الظروف اللي اتحطت فيها والتمن اللي دفعته لوحدها واحنا كنا قاعدين نعمل بانرات في بيوتنا قدام التكييف
يا جماعة إحنا بنغير بلد بنحرر شعب في معركة طويلة وليها خسايرالقضية مش واقفة على إسراء ولا عمر ولا حسين
القضية قضية الشعب ده اللي كلنا عارفين هو اتظلم واتنهب قد إيه
معركتنا هنكملها لأن نتيجتها هتحدد مستقبلنا ومستقبل ولادنا انسوا أي حاجة تانية وركزوا ع الهدف وما تساعدوش العادلي وكلابه في تحقيق خطتهم إسراء دفعت تمن محدش فينا دفعه وأجبروها على ده وأنا متأكد إنها بتعمله غصب عنها ومفيش حاجة اتغيرت في أفكارها خصوصا بعد الوساخة اللشافتها منهم هتبقوا إنتوا والعادلي عليها ؟ ارحموها يا رجالة بشنبات واللي عايز شهدا وضحايا للتغيير قدامه الميدان يتفضل يورينا نفسه
وبعدين محدش فيكم فهم حاجة من كلامها اللي قالته في الأخرإنها عايزة تخرج من مصر ومترجعش محدش فهم الرسالة الضمنية في الكلام ده هي لو كانت غيرت موقفها أو قابلة الوضع اللي حاصل كانت هتقول كدة ؟ إسراء م الاخر بتقول بعد اللي حصل من الكلاب دول ومحدش منعهم مبقاليش عيشة في البلد
حمد لله على سلامتك يا إسراء يا غالية واحنا كنا بنشتغل عشان مصر مش عشان إسراء يا رجالة

هناك تعليق واحد:

Night's Silent يقول...

تتم إفتتاح منتديات النقاش على الموقع لمزيد من التنظيم والترتيب

ولبدأ التحضير الحقيقي ل 4 مايو

المجموعة الرسمية على الFacebook:

http://www.facebook.com/group.php?gid=9973986703

الموقع الرسمي:

http://www.facebook.com

منتدى النقاش:

http://www.6-april.com/forum

ننتظر المشاركة ، ونرجو التعميم والنشر على كل الأصدقاء والأقارب